الاثنين، أبريل ٢٤، ٢٠٠٦

الـ Tablet PCs تنتشر في المدارس.

هناك صراع دائم في العالم منذ ظهور أجهزة الكمبيوتر حتى الآن حول السؤال العجيب "هل سيستبدل الكمبيوتر كل الورق الموجود في حياتنا ؟" طبعا المقصود بالكمبيوتر هنا هو الكمبيوتر بجميع أشكاله الكبيره والصغيره والأجهزه المحموله في اليد.

والاجابه دائما ومنذ فتره كبيره تكون , "في الوقع ليس بعد , ربما في الفتره المقبله ",, وها نحن أصبحنا في الفترات المقبله ولكن مازالت الأوراق في كل مكان ولا يستطيع أى شخص الاستغناء عنها , ومازالت الاجابه على ذلك السؤال ... "ليس بعد ربما في الفتره المقبله".
منذ فتره , وأنا أتجول فوق الانترنت ! رأيت أكثر من موضوع يتحدث عن طريقه جديده لادارة الفصول في المدارس بالاعتماد على الأجهزه ( الكمبيوتر في الغالب ! ) والحقيقه اندهشت عندما وجدتهم جربوا وطبقوا هذه الطرق الجديده في بعض المدارس والجامعات في أوروبا وأميركا.

من موقع Channel9 , رأيت فيديو قد صوروه من جامعة واشنطن , واندهشت حقيقة عندما وجدت كل هذه الكميه الهائله من الـ Tablet PCs في قاعة المحاضرات , فكل طالب أمامه Tablet PC خاص به وبالطبع المحاضر نفسه لم ينسوه.
كل الأجهزه متصله بجهاز المحاضر ( وربما أيضا ببعضها البعض ) وتتيح وتوفر التفاعل بين الطلاب والمحاضر بطريقه غير الطريقه المعتاد عليها والتي تجبر كل من يريد أن يناقش شئ بأن يرفع يده وينتظر اشارة المحاضر له بالوقوف .. والخ , فبكل سهوله وانت في مكانك تكتب ما تريد وترسله لجهاز المحاضر. وهذه الطريقه أيضا تقضي على مشكلة الخجل , لأننا لا ننكر أنه يوجد الكثير من الطلاب الخجولين وخجلهم هذا يقضي على الابداع والمشاركه , فيخاف أو يخجل الكثير منهم بل ويشعرون بالارتباك عندما يقفون في قاعة محاضرات ليتحدثوا عن شئ أو ليجاوبوا على شئ في الحين الذي ينظر اليهم كل الموجودين في القاعه.

أيضا لا داعي للأقلام ولا داعي لوجود ألوان وآلات حاسبه ولا داعي لهذه الأمور وانت في المحاضره , فكل شئ متوفر بمجرد تشغيل الـ Tablet PC ,, ويمكن الاستفاده من البرامج الخاصه بتكملة الكلمات عنك بمجرد كتابة بعض الحروف , وأيضا الأدوات الخاصه بتصحيح الأخطاء ,, ويمكن الاستفاده من القواميس والخ , ولن يواجه المدرسين أى مشاكل في قراءة ما يكتبه الطلاب بسبب سوء الخط والأخطاء الاملائيه !

وطبعا اذا كنت في محاضره خاصه بالعلوم أو بالرياضيات , فلا داعي للقلق حول كتابة الرموز الرياضيه والعلميه ومشاكل كتابة المعادلات , فيمكنك استخدام خط يدك حينئذ , وكل الـ Tablet PCs أعتقد انها تدعم ذلك.

هذه بعض الصور , التقطها من مقطع فيديو كنت قد حملته من موقع Channel9 ... وهى قاعة محاضرات في جامعة واشنطن :

الأمر لم يقتصر على الجامعات فقط , فقد رأيت في موقع on10 فيديو آخر يتحدث عن هذا الأمر , ولكن في المدارس العاديه وليس في الجامعات , وفي المدرسه ( يجب ) على كل طالب\طالبه أن يأتي الى المدرسه وهو معه الـ Tablet PC الخاص به ( بخلاف جامعة واشنطن فقاعة المحاضرات هناك تكون مجهزه بالأجهزه ) ووجدوا أن الطلاب بالرغم من صغر أعمارهم الا أنهم يستخدمون الأجهزه بشكل ممتاز ويستمتعون بذلك.

هذه بعض الصور من مدرسه في واشنطن , أيضا التقطتها من فيديو قد حملته من موقع on10:



المفروض أن أنهي الموضوع الآن فكل موضوع يجب أن يكون له خاتمه , ولكن لا أريد ان أنهي الموضوع بمقارنة بين التعليم والفصول في مدارسنا الموجوده في العالم العربي بالأخرى الموجوده في ( العالم الآخر ) لأن العقل تعب من كثرة الكلام والقراءه والتفكير في الواقع الأليم الذي نعيشه ولا داعي بأن أسأل " ياترى متى سنرى المدارس بهذا الشكل في العالم العربي ؟ " ... لا داعي لاداعي .. فمازالت بعض المدارس في مصر آيله للسقوط ومازالت بعض الفصول بدون سقف يذكر ( فصول صيفي يعني ) ومازالت الكثير جدا من الفصول المصممه بأن تحتوي على عشرين أو ثلاثين طالب على الأكثر ... يجلس بها أكثر من سبعين ! ومازال الضرب والاهانه يعاني منه الكثير من الطلاب في المرحله الابتدائيه والاعدادايه ومازال الطلاب يذهبون الى المدرسه وهم يحملون أطنان من الكتب فوق ظهورهم ( وياريته بينفع ) ومازالت ادارة الكثير جدا من المدارس تغلق المعامل وخصوصا حجرة الكمبيوتر باستخدام آخر ما توصل اليه العلم من الأقفال والأسلاك الشائكه لأن الأشياء الموجوده بها عهده , وممكن أحد الطلاب يخربها بدون أن يدري ! وساعتها تبأه مصيبه ! , وكل ذلك هنا في الوقت نفسه الذي يفكر فيه ( العالم الآخر ) في كيفية مساعدة الطلاب الخجولين وكيفية توفير طرق لجعل التعليم ممتع ( أقصد أكثر امتاعا ) ... ممتلئ بالـ Multimedia ولذيذ و ( مفيد ) على الأقل !

برنامج تدريب الشباب !



Youth! Program!

زي مانت شايف في الصوره , ( الشباب !! ) المصري اللي فوق الخمسين سنه بيتدرب على الكمبيوتر ! الصوره جيبها من موقع ميكروسوفت مصر , وأعتقد أنه كان هيبأه من المسخره أكتر انهم يقولوا على البرنامج التدريبي ده ... برنامج تدريب الأشبال ! أو برنامج تدريب الكوادر الصغيره ! بدل مايسموه برنامج تدريب الشباب !

لا يوجد للأسف هناك صور أخرى توضح لنا كم هي فعلا نسبة ( الشباب ! ) الموجود في برنامج تدريب ( الشباب ! ) ... فـ الواسطه واضح انها موجوده موجوده وواضح أنه أصبح عندها الاماكنيات ( ما شاء الله ) انها تدخل ناس عندها 60 سنه في برنامج لتدريب الشباب !

ياريت الشركات أمثال ميكروسوفت وخلافه ( تكبر دماغها ) من موضوع برامج التدريب والمنح وهذه الأشياء ,, فهى تكلفهم ( فلوس وقلق ) على الفاضي , لا يوجد من يريد الفهم ولا يوجد من يريد التعلم , لو عاوزين يعملوا منح يبأه المفروض هم اللي يتولوا العمليه الاداريه وليس فقط المناهج أو المعامل وأيضا بجانب تولي عملية الرقابه وتقييم الأداء, انما أى حاجه بتدخل فيها الحكومه ( بتبأه حاجه تقرف )... ومش محتاج أقول.

http://www.microsoft.com/middleeast/egypt/press/presspage.aspx?include=/middleeast/egypt/press/2006/trainingcenters.htm

الأحد، أبريل ٢٣، ٢٠٠٦

نحن لا نعيش في عصر المعلومات ولا حاجه

زي مابيتقال , ان المخ بيبني على آخر تجربه مر بها , فلو عان شخص ما من الظلم مؤخرا وسألته ماذا تسمي هذا العصر فسيقول لك ان هذا هو عصر الاضطهاد والظلم وجتكم الأرف وحسبنا الله ونعم الوكيل والخ ومش هيسيبك تمشي من قدامه وكأنك انت اللي ظلمته.


فعلا دايما بيحصل كدا وكل الناس اللي بتعرف ( تصيغ تعريفات للـ ) الحاجات ( الأشياء ) بتعرفها على أساس ماهى شايفاها !

مثلا تعريف الستات ( النساء ) بتلائي الناس عرفوهم مليون مره بشكل مختلف ( وأحيانا متخلف ) ... اللي يقولك .. بص ياسيدي الست عامله زى السيجاره بالظبط لما مش عارف ايه بتعمل ايه ! واللي يقولك الستات دول زى المايه ( المياه ) لما مش عارف ايه بتقوم عامله مش عارف ايه ... والخ.

أيضا , الدنيا , اتعرفت مليون مره ,, وأشهر تعريف متخلف هو "الدنيا دي كاس وسيجاره" ( مش عارف ايه حكاية السجاير دي ؟! ).

انما بأه تعريف نوع أو سمة العصر اللي احنا عايشين فيه ,, فالناس بتجعجع كتير طحن في الموضوع ده ( وزى مانت شايف أنا كاتب الموضوع ده أصلا علشان أجعحع فيه أنا كمان) ومن أشهر ما لقب بيه العصر ده ان هو "عصر المعلومات" أو "عصر تكنولوجيا المعلومات" أو "عصر الانترنت" أو الخ.

المشكله برده في تلقيب العصر بتاعنا ده لقب معين , ان كل اللي بيصدر لقب عليه بيبأه باني رأيه على آخر تجربه مر بيها أو على حاجه مؤثره حصلتله , وده بيلخبط الناس وهى عايشه وماشيه في "العصر" لأنها مش عارفه تحدد هو عصر ايه بالظبط ! ( أنا عن نفسي أعرف واحد تاه في العصر قبل كدا وماعرفناش نجيبه بسبب الموضوع ده )... طيب ايه الحل ؟


الحل ان كل واحد يقلع النضاره اللي لابسها علشان يقدر يشوف الحاجات على طبيعتها فالشخص اللي لابس نضاره بعدسات لونها أحمر بالتأكيد هيوصف كل حاجه يشوفها بان لونها أحمر ولو قلتله تلقب العصر ده بايه هيقولك ألقبه بـ "عصر الاحمرار"!

لكن الحقيقه موضوع ان الواحد يقلع النضاره ده.. حاجه صعبه جدا , فمستحيل ( منطقيا ) ان الواحد يرمي اللي اتربى عليه ويرمي ثقافته ومعتقداته بسهوله ! طيب ايه الحل ؟

الحل ان كلنا نجتمع ونمسك شخص ونعد نضربه لغاية لما نكسرله النضاره أو لغاية لما تقع من على وشه ( وجهه ) وبعدها نسأله تلقب العصر ده بايه ؟,,, بس المشكله في الحل ده ان من غير المنطقي ان احنا نثق في كلام شخص واكل كل الضرب ده على دماغه !

طيب ايه الحل ؟

الحل ان احنا نشوف رأى كل الناس في "العصر" واللقب اللي نجد معظم الناس أجتمعوا عليه يبأه هو ده العصر . , لكن برده فيه مشكله ! مش لازم تكون الحاجه اللي اجتمت عليها الناس تكون هى الصحيحه ! مين عارف ... ممكن مثلا يكونوا كلهم لابسين نضاره نفس الموديل أو يكونوا مثلا جايبنها من محل واحد !

طيب ايه الحل ؟

الحل ان انت تثق فيا ( يا سلام ياخويا )! أيوا ماهو لازم نثق في واحد مؤقتا ونخليه يعرف لنا العصر وبعد كدا واحنا ماشيين في "العصر" نشوف هل فعلا العصر زى ما الواحد ده قالنا عليه ولا لأ , ولو لأ يبأه ندور على واحد تاني نثق فيه وهكذا !

ماشي, عصر ايه بأه اللي احنا عايشين فيه ده ؟

وثقت فيا الأول ؟

أيوا , قول

أنا بقول ان ده هو "عصر الهجص" و "الجعجعه" .. فكل الناس بتهجص بجد , والكل ماشي في العصر عمال بيجعجع ( وبصوت عالي ) والناس لما بتسمعه ,, بدل ما تقوله انت بتجعجع ,, تقوم هي كمان مجعجعه أو مهجصه ( على حسب ) ,, وبكدا أصبح العصر اللي احنا فيه هو "عصر الجعجه والهجص" وأحيانا الشخص يكون انسان عادي ولكن يلائي ( يجد ) كل اللي حواليه ( حوله ) بيجعجعوا أو بيهجصوا فيضطر يعمل زيهم.

السياسيين بيجعجعوا طحن , وحتى العلماء اللي طفشوا من بلادنا , لما بيرجعوا عندنا في زيارات خاطفه بيعدوا يهجصوا علشان مش لائيين حد عاوز يفهم ولئوا ( وجدوا ) الناس آعدين تهجص !.. مثلا الدكتور أحمد زويل لما بيرجع مصر في زيارات بتكون حوالي 48 ساعه أو أقل أو أكثر قليلا .. يعمل ندوه أو اتنين ويطلع في برنامج أو اتنين وتبأه كدا خلاص خلصت الزياره !

طبعا دي حاجه كويسه لما ييجي يعمل ندوات انما المشكله ان الناس كلها الموجوده في الندوات لا تتفاعل اطلاقا ولا تسأله الا عن أشياء متخلفه زي "ما رأيك في الحياه السياسيه في مصر ؟" وهل رشحت نفسك للرئاسه وهل وهل وهل ولا تجد من يسأله أى سؤال متخصص في مجاله الا قليلا جدا جد ا جدا وتكون كمان أسئله عامه جدا عن "التكنولوجيا" غير متخصصه ( وتظهر بأنها متخصصه ). وفي البرامج لا تجد أسئله الا مثل "سمعنا أنك تحب أم كلثوم ... احكيلنا بأه ... " و "هل أمريكا حلوه ؟" و "قالوا عليك كذا فهل هذا صحيح ؟" و " جعجع جعجع " والناس بتتفرج والوقت بيضيع في كلام هجص لا بيقدم ولا بينفع والاعلانات شغاله والهجص معاها ما بيخلصش!

ولو جيت بأه للنسبه الأكبر من الشباب ... فـ ( صباح الهجص يامعلم) .. أنا مش محتاج أحكيلك مانت عارف ... "الرنه دي مش كوول خالص" و "ابعت لاصحابك افتكاسات جديده" و "البت مش عارف مين عملت مش عارف ايه" و "تامر حسني دخل السجن" و "فاطمه عيد نزلت ألبوم!" والخ من الهجص والكلام الخايب.

اللي فات ده كان بالنسبه للناس العاديين اللي بيهجصوا .. انما ما تنساش بأه ان احنا عندنا ناس أصلا تخصص هجص وجعجعه وما يعرفوش غيره ! مش عارفهم ؟ دول ماليين التلفزيونات ؟! ( لأ ما اقصدش الاليكترونيات ) أيوا يا عم أقصد الممثلين والممثلات والمخرجين والمخرجات فالأغلبيه العظمى منهم تخصص هجص وجعجعه فتلائي منهم اللي بتقول أنها مش بتتباس الا لما يكون بوسه هادفه وبتخدم البتاع ده الفكره أو القصه أو الله أعلم مين وتلائي منهم اللي تقول انه جالها حاله نفسيه وراحت لدكتور نفسي علشان عملت دور واحده مجنونه في فيلم وبعدها عملت دور واحده مهندسه في مسلسل !! ( ربنا يخادهم ) وفي كل الأحول ما بيتقالش حاجه على لسانهم ( باالاضافه الى الهجص ) غير ان التمثيل هو فن وفن هادف والفن رساله ( Message ! ) وبعد مليون سنه من التمثيل والسينيما والأفلام ... ايه هى الرساله اللي وصلت ( ممكن تكون لسه Pending ؟! احتمال !) وايه هى الحاجه اللي اتغيرت ؟! ... كله "أكل عيش" بالاضافه الى عشق للهجص والجعجعه.

كل ده ويتقال لسه على العصر انه "عصر المعلومات" !!! معلومات ايه ؟! نحن نعيش في عصر الهجص يا جدعان. أيوا زى مابقولك كدا ... حط في دماغك الموضوع ده وامشي في "العصر" والحياه , يمين وشمال وفوق ويمين ( أيوا امشي في اليمين مرتين ) هتلائي كل اللي بتاقبلهم هم ناس آعده تهجص وانت مش واخد بالك ولو واحد كان عاوز منك حاجه هتلائيه أعد يجعجع ويقولك في هجص علشان تعمله اللي هو عاوزه.

آآآآآآآآآآآآآه , جتكم الأرف

مرحبا

أول بوست ( POST not Kissed ) ,, ياسلام ,, بعد تعديل الستايل ( Style ) علشان يظهر العربي ( Arabic ) كويس.